«Men Qazaqstan Respýblıkasynyń Prezıdenti retindegi ókilettigimdi toqtatý jóninde sheshim qabyldadym. Bul – ońaı sheshim emes» dedi Nazarbaev seısenbi kúni halyqqa Úndeýinde. N.Nazarbaev 2020 jylǵy saılaýǵa deıin Prezıdenttik ókilettiktiń Senat tóraǵasy qyzmetin atqarǵan Qasym-Jomart Toqaevqa júkteletinin málimdedi. Sonymen qatar Qaýipsizdik keńestiń Tóraǵasy, «Nur Otan» partııasynyń Tóraǵasy jáne Konstıtýsııalyq keńestiń múshesi laýazymynda qala beretinin aıtty. «О́zderińizben birge bolamyn. Elimizdiń, halqymyzdyń qamy – meniń múddem bolyp qala beredi», dedi N.Nazarbaev» deıdi Bloomberg.
Budan keıin Bloomberg saıty birqatar sarapshylardyń eldegi bıliktiń aýysýy týraly pikirin keltirgen.
«Toqaev qazirgi el tizginin ustaǵandar arasyndaǵy yqpaldy tulǵa, sondyqtan bılikte qalýy múmkin», deıdi Ortalyq Azııa jónindegi sarapshy Danııl Kıslov. Ol osy oqıǵany 1999 jyly Reseıdegi bıliktiń aýysýyn, ıaǵnı Borıs Elsındi Pýtınniń almastyrýymen salystyryp, «eshqandaı daǵdarys bolmaıdy» dep esepteıdi.
«Prezıdenttiń qyzmetinen bas tartýy jańa kezeńniń kelgenin kórsetedi. Nazarbaev áli de saıası, ekonomıkalyq yqpalyn saqtap, sheshim qabyldaýǵa áser ete bermek», deıdi Prism kompanııasynyń saıası rısk-menedjment jónindegi sarapshy Keıt Mallınson.
Al Standard Life Investment Ltd qorynyń qazaqstandyq eýrooblıgasııany basqarýshy Kıran Kertıs «N.Nazarbaev muny áldeqashan josparlap qoıǵany belgili. Biraq kútpegen jerden málimdeme jasady», dep esepteıdi.
«Nazarbaev árdaıym Ortalyq Azııa kóshbasshylarynan shoqtyǵy bıik turǵan-dy. Eldegi munaı qorynyń arqasynda ol halyqaralyq arenada Qazaqstan atyn tanyta bildi. Nazarbaev saýda-ekonomıkalyq baılanysy bar eldermen jaqsy qarym-qatynas saqtap qaldy. Ári aqsaqal memlekettik qaıratker retinde qurmetke laıyq», dep túıindelgen Bloomberg-tegi maqala.
